مقتطفات غنائية من اخر مسرحياتى

مقتطفات غنائية من اخر مسرحياتى - مجانين على السطوح - سيتم نزولها الاسواق باول 2010 ان شاء الله

...................

1-

البدرومات كانت زمان مهد الكفاح
كانت بتنشع الف ثورة بالف روح
دلوقتى لو هتشب ثوره مالجراح
راح تشتعل من ضرس عيل عالسطوح
ماكفرش صابر لما قال عالجوا الولد
ولا عنده حل يفك اسره م الديون
راجل كما كل اللى فوق سطح البلد
عايش وراضى باللى مقسوم كل يوم
هو الوباء لازم يجيلنا م العجم
علشان مانيجى نطيب الغلبان بلاش
ولا احنا غاويين استيراد حتى الحكم
لما نحكم ماتش دورى وماتش كاس
خفوا الهموم لاجلن يعيشوا زيكم
ربوا القلوب عالطبطبة وكفايه قهر
لافيوم عيعلوا وياخدوا متر فأرضكم
ولا حتى ليهم رميه تجلب عالى زهر
هو النظام معمول لكم ولا لنا
الرؤية واضحة عندكم غيم عندنا
الست ليها الف ملمح عندكم
واحنا اللى مش عارفين نشوفها بأى وش
..................................

2-

عرفنى فين العلم وافرشلى الطريق
وانا ابقى عالم وابقى عارف كل شىء
العلم نور ومعاك نقول ده كلام سليم
بس العيال لو راحوا هنجيبهم منين
عبده الفقير ومراته مش مجانين جداد
دول خلق عايشه عالسطوح وسط العباد
عايزين يناموا او يقوموا عالامان
الدنيا ايه فعيونهم الا العيلين؟
ان كات جرايم امسكولنا المجرمين
وان كات اشاعه وضحولنا العيب منين
مش لما نصرخ نبقى عالم مخبولين!!!!

.....................
3-

قسم وسمع فى اللى رايح واللى جاى
الليلة فرح الميتين مش فرح حى
افرد عيدان النور وعالى المكرفون
ربك لوحده هو عالم ايه اللى جاى
والله
حى
والله
اى
الليلة ليلتك ياللى والملايكه مسندين
للحى والخيمة خيمتك ياللى حى ف ميتين
للجبل اصلب فهامتك ده انت تحتك غلبانين
لو ماتوا تحتك مش هيطلع بكره ضى
الله
حى
والله
اى

عشوا جامده وعشوا نيه

وعشوا حلوة ومستويه
وعشوااهيه بايته خايفه
بس خوفها مش قضيه
القضيه ان بكره
مش بييجى الناحيه دى
او يفكر فاللى عايش
فوق سطوح الغلب فارش
حلم عمره تحت صخره
لو تقع تصحى القضيه
الحقوهم ياللى عشتوا
كل يوم مابتلحقوش
ارحموهم مره واحدة
انتو ايه مابتزهقوش
الجنان مش خلق عايشه
تحت رحمة صخر باش
الجنان ان انتو دايما
بتشوفونا ناس بلاش
ارحموهم وارحمونا
واروا جوفنا ببوق مى
الله
حى
والله
اى
...............................

4-

معرفتكيش الا كده
ولا داس عليا ميت وابور
الا وانا واقف كده
شامخ كما عود الوتد
الى يكسر الف لودر
جاى يزيله مالطريق
مزروع هنا زى التاريخ
اللى معشش جوا طينك م الازل
بيقولوا ناس البدرومات
فالعشرينات كانم دايات
يصرخ على ايدها التاريخ ثورة ولد
دلوقتى اهل البدرومات
سكنوا السطوح
وهتلقى فيهم ميت عرابى
والف ناصر يتولد
وهيرسمولك وش واضح
ويخلوا ريحتك فى المطارح
ويرصوا فسريرك مولل
ماحناش رغيف بيدوب فى بق
ابن الزوات
ولا جيش عباد رايح يصوت
للامير
ماحناش بطون يتسد جوفها
بالتراب
احنا البلد وانتو اللى اغراب
مش كتير

...............................

5-

وبهرب كل يوم وبخاف
وبتكور فى متر لحاف
وليه تلدعنى حية جوع
بتخرج من شقوق بيتهم
انا واحد مبتشوفنيش
سوى زحمة طابور العيش
انا راهب مالوش اجراس
تلم الخلق تجمعهم
تاريخى و لبسوه فالحيط
وعقلى و قالوا عنه عبيط
لانى لم بلف الخيط
وبغزل غزل يسترهم
شبابى عالسطوح بيضيع
وعمرى لم يزوره ربيع
ودمعى خارج المواضيع
لانى حد مش منهم
ومين احنا ومين هما
وفين العدل ده بيتباع
يامين يرحمنا ينصفنا
ويعدل قلبة الاوضاع


..................

6-

بلدى يابلدى
وانا نفسى فحضن بلدى
بلدى طاحونة
تطحنى قمح دهبى
وتطعم بطن اخويا
وتجوع بطن ولدى
بلدى يابلدى
بلدى ياغيه
فوق سطح بيوت غلابه
بلدى تكية
مالكنها الغرب يابا
ويلك ياصبيه
من حضن ناس ديابه
بلدى يا بلدى
وانا نفسى فحضن بلدى

......................

7-

زفوا البنيه عالولد قلب العوازل ينكووا
الواد زينة طرح البلد والبت منجات واستوا
من حقنا نشرب كما صفوة بلدنا بيشربوا
ولا عشان ساكنين سطوح يبقى عقولونا يتربوا
كل العباد فرحم ولا ناس البلد دى بيفرحوا
الضحكة صابت حيهم واحنا اللى قلوبنا نوحوا
الفكة راتب شغلنا بالالف هما يقبضوا
عايزين ميزان يحكملنا حكم العداله والنبى
عايزين طاحونة تبرنا مالهاش مدير طماع غبى
مالناش سبيل غير ربنا والله يراضينا باه
لو موتنا مالجوع كلنا راح يدفنونا فالهوا
اصل الطرب متعبيه ولا يندفن غير فهلوى
غاوى الغنا على طبلهم والطبل عالى بالقوى
وان عيشنا هنكون وسطهم زى الخدم والسوفرجى
واحنا اللى وارثين زيهم بس الميراث مش حنبلى
ده الورث ضايع عندهم والمحرومين كترم اوى
شدوا الحزام على بطننا ومرحرحين على بطنهم
لموا الوظايف مننا وادوها لابن عمهم
الله يسامحهم باه عالى جرالنا منهم
الله يسامحهم باه عالى جرالنا منهم

...........................

8-

قالوا يافرعون اختشى
ده العمر فوق ضهرك مشى
وانت صلاتك لم بتطرح عالجبين سكة سجود
رد اللى متفرعن وقال
مشروع لكم وأد العيال
وتعلقوا صورة الرجال
اما الادان مش هتلاقوله اى سكه للهرم
قالوا يافرعون نهدمه
بعقول جديده نصممه
رد الوزير هامان وقال
اللى بذله يبنى عالى الاهرامات
صعب تلاقيله همه تانيه تقومه
وانا من سطوحك جاى اقول من مطرحى
أنا عشت راجل طول حياتى فالسجون
وف حر عمرى مستحيل راح اكون مره

تحياتى من فوق سطوح الهم وتحت انقاض الحلم المصرى

احمد حسن احمد