أحلامى بتهرب قدامى
وأنا واقف وسط الأطلال
والناس بتملِّس فى مقامى
وكإنى بشوف المستور
فاكرين الفارس بات غالب
فاكرينه بيرسم أقدار
والفارس مش لاقى حصانه
وفإيده الدرع المكسور
لو كنت ف حكاويكو زناتى
أو قادر أدوَّر قواتى
وأهزم فى المارد والغول
فانا جثة إنسان مش فارس
سبتمبر جابنى ده مش مارس
على قلب الدنيا الصفوان
أنا أضعف من قوة لحنى
أنا واقف للموت فى طابور
ولا قادر أقرب من دُورى
وأتخشب وأدفن فى غرورى
ولا قادر أعاود وأتنفس
وأجمَّع شملى المبتور
الوعد وحالف يهزمنى
والفقر تملى ملجِّمنى
والجاى مصمم يحرمنى
من كسرة خبز الأوطان
محتاجك والدم بينشف
مشتاق الحضن اللى بيعرف
يملانى بحنية وشوق
ياشبابى ياغنوة بتتردد
فى لسان الجسم المتمدد
يا سنين الطفل اللى إتغرب
فى زمان المال المعلول
من آخر مواويل العالم
بتنسم ريحتك ألحان
من آخر زفرة فأنفاسى
ببعتلك ذرة إنسان
كان عاشق على قد ماحاول
كان بنا مشاعر ومناول
كان نفسه يضمك إنسانة
وماضمش غير الأكفان
من شارع خادنا وودانا
لمراسم دفن وعايشانا
لملامح ماتت جوانا
لسرير الحزن المفروش
بكتبلك آخر حكايتنا
وبكسّر فناجين القهوة
وبكدِّب رؤيا العراف
ولا فينا العشق اللى بيبهر
ولا فيا الفارس ولا فيكى
تفاصيل السحر اللى بيأسر
ده يادوبك كان بينا كابوس
0 comments:
Post a Comment